“Байаҕантай” информационнай киин Планерка сонуннара Балаҕан ыйын 21 күн, бэнидиэнььик, 2026 сыл

Россияҕа Судаарыстыбаннай Думаҕа балаҕан ыйын 18-20 күүнэригэр ыытыллыбыт быыбарга Баайаҕа быыбардааччылара 74,08% кытыннылар. Онтон 167 быыбардааччы Биир Ньыгыл Россияҕа, 131 – КПРФ, Сиэрдээх Россияҕа – 20, 18 — Саҥа дьон партияларга санаалара оҕунна. Петр Шамаев — 160, Ньургуяна Заморщикова -80, Айаан Васильев-54, Федот Тумусов- 39 куолаһы ыллылар.
Оскуола директора И.В.Старостин Баайаҕаттан 7 оскуоланы бүтэрээччилэртэн 4 оҕо үрдүк, 3 орто анал үөрэхтэргэ, 10 кылаас кэннэ биир оҕо орто үөрэххэ киирбитин иһитиннэрдэ. Баайаҕа орто оскуолатын Кыһыл көмүс мэтээлинэн бүтэрбит Алина Дедюкина К.И.Саптаева аатынан Казахстан национальнай университетыгар “Социология инновационных открытий и лидерства” специальноска үөрэнэ киирдэ.

-Балаҕан ыйын 16 күнүгэр “Кыһыл Кутаама омоон суолларынан” кинигэ биһирэмэ үрдүк таһымҥа ыытылынна. Кутаамалар холкуостарын кинигэтэ тахсыытын түмсүүлээхтик тэринэн бэлиэтээтилэр. “Кыһыл Кутаама омоон суолларынан” кинигэни кыраайы үөрэтээччилэр, биир дойдулаахтарбыт Изабелла Александровна Сивцева, Маргарита Романовна Егорова, Александра Дмитриевна Тимофеева суруйан-бичийэн, хомуйан оҥордулар. Ааптардартан биһирэмҥэ 4 холкуос историятын кинигэ оҥорон таһаарбыт Маргарита Романовна күндү ыалдьыт буолла. Мустубут дьон “Кутаамам, Кутаамам, Куруук саныыр Кутаамам” – Кутааматтан төрүттээх дьон таһаарбыт, бу сир дьонун-сэргэтин туһунан кинигэ, музей матырыйаалларынан , “Өбүгэм мала” быыстапкалары көрдүлэр, 7 кылаас үөрэнээччитэ Рома Романов Кутаама үһүйээннэринэн кэпсээнин иһиттилэр. Кутааматтан хаан тамайар дьон кинигэни хомуйан оҥорбут дьоҥҥо, сээркээн сэһэнньит Р.Е.Хатылаевка-Кутаамыскайга дириҥ махталларын кини кыргыттарыгар тиэртилэр, кинигэ олус үчүгэйдик таҥыллыбытын, үгүс архыып докумуоннара киирбитин, уус-ураннык, умсугутуулаахтык суруллубутун бэлиэтээтилэр, төрүт түөлбэлэрин дьонун-сэргэтин иһирэхтик ахтан аастылар. (Сиһилии информация бу ый 18 күнүгэр сайтка тахсыбыта.)

-Балаҕан ыйын 19 күнүгэр нэһилиэккэ “Көмүс күһүн” бырааһынньыга буолан ааста. Мустубут дьон Баайаҕа айар куттаахтара дьыл биир дьикти кэмигэр анаабыт хоһооннорунан поэтическай композицияны иһиттилэр. Сайыҥҥы быйаҥтан атыы-тутуу дьаарбаҥката, үгүс көрдөөх оонньуулар ыытылыннылар, ким көхтөөх үчүгэй бириистэри сүүйэн үөрдэ-көттө.

— “Мандар кыһата” Айылгы, Айымньы киинигэр быйыл ремонт ыытылынна. “Почта России” саҥа дьиэтин женсоветтар сууйан-сотон бэлэмнээтилэр. Ураһаҕа туостар кэлэннэр үлэ салҕанна. Бүгүн саҥа тутуллар уопсай дьиэҕэ оскуола улахан кылааһын оҕолоро даҥ кутуутугар субуотунньуктуохтара.