Баайаҕа нэһилиэгин хаартыскаларын архыыба

Хаартыска бэйэтин түһэриллибит кэмин, түгэнин эрэ үйэтитэр аналлаах буолбакка, киһи аймах олоҕун культуратын биир сүрүн чааһа буолар. Онон олоххо саҥа кэлбит киһи инники көлүөнэ хайдах туох олорон ааспытын билэригэр, сыаналыырыгар, бэйэтин олоххо көрүүтүн оҥосторугар сүҥкэн суолталаах буолара саарбаҕа суох.

Онон бу сайтка киирбит хаартыскалар ааспыт үйэҕэ биһиги дойдубутугар, Баайаҕа Томторугар дьон сэргэ, чуолаан оскуола оҕолоро, үлэһиттэр хайдах туох олорон ааспыттарын ырылыччы ыраастык көрдөрөр дьиҥнээх туоһулар буолаллар. 40-50 сыл анараа өттүгэр бу Баайаҕабыт Томторугар кыһыл хаалтыстаах уолаттар уонна кыргыттар Күөх Маайы көрсө, кыайтарары билбэтэх кыыһар кыһыл былаахтаах, плакат тутуурдаах хаамса сылдьалларыттан, хайдах сэбэрэлээх, хайдах таҥастаах саптаах, харахтара уоттаах туралларыттан, бу хаартыскалары көрбүт ама ким сүрэҕэ долгуйуо, өрүкүйүө суоҕай?!

Ол курдук биһиги учууталбыт Баайаҕа олохтооҕо, педагогическай үлэ бэтэрээнэ, Российскай Федерация үөрэҕириитин туйгуна, Учууталлар учууталлара, Баайаҕа нэһилиэгин бочуоттаах олохтооҕо Семен Прокопьевич Винокуров 1960 с. сыллартан түһэртээбит хаартыскаларын аныгы технологиянан оцифровкалаан бу сайтка уктубут. Итиэннэ мин, бэйэм төрөөбүт дойдубар, Баайаҕабар тиийдэхпинэ, араас мероприятияларга сырыттахпына, түһэртээбит хаартыскаларбын уктум.

Киирэн көрүҥ, сөҕүҥ, оҕо сааскытын санааҥ, олоххутугар тирэхтэ ылыҥ уонна инники диэки эрэллээхтик көрүҥ!

«Барыбыт туһугар, Баайаҕабыт туһугар!»

Атын да фотографтар дойдуларын дьонун түһэртээбит хаартыскаларын группалаан, наардаан, сылын хонугун суруйан угуохтарын сөп этэ...

Андросов Иван Михайлович