“Байаҕантай” информационнай киин Планерка сонуннара Кулун тутар 10 күнэ, 2026 с. Оптуорунньук

— Баайаҕа ОДЬКХ тэрилтэтигэр Анал байыаннай дьайыыга олоҕун толук уурбут буойун — ыччаппыт, “Эр санаа” орденынан наҕараадаламмыт Василий Андросовка Мемориальнай дуоска аһылынна. Василий Гаврильевич нэһилиэкпит тутаах тэрилтэтигэр сантехнигынан үлэлээбитэ. Өйдөбүнньүк бэлиэ Ийэ дойдуга бэриниилээх буолуу холобурун көрдөрбүт хорсун ыччаппыт сырдык аатын ааттата туруо.

— Кулун тутар 4-8 кк. улуус киинигэр А.Турнин аатынан спорт уораҕайыгар Саха сирин эр дьоҥҥо волейболга Чемпионатыгар тыҥааһыннаах күрэскэ Таатта хамаандата бастаата.

— Почтаҕа саҥа дьиэ тутуутугар федеральнай үп көрүллүбүт, тутуллар сирэ быһаарыллыбыт.

— Балыыһа тутуутугар нэһилиэк өттүттэн ыытыллар үлэлэргэ анаан Дьокуускайга олорор биир дойдулаахтарбыт (куорат баайаҕалара) 73.000 солк. көмөлөстүлэр.

— “Кулун тутар 4 – 6 кк. Дьокуускайга ыытыллыбыт XVI “Якутия мастеровая” быыстапка-дьаарбаҥкаҕа Баайаҕаттан 5 маастар кыттыыны ылла. “Испэ туос” түмсүү “Айыылар Ытык иһиттэрэ” оҥоһугунан “Новаторское решение” аатынан бэлиэтэннэ, биир дойдулаахпыт, норуот маастара Сарыал Билюкин уус-уран оҥоһуулаах быһаҕынан 1 миэстэни ылла. “Битва клинков” күрэхтэһиигэ Баайаҕаттан 7 тимир ууһа биилээхтэрин тургутан көрдүлэр. Үгэс курдук, сахалыы таҥастаах сэлэлии хаамыыга кыттыстыбыт”,- диэн “Мандар Уус” киин салайааччыта П.П. Бурнашева сырдатта.

-Кулун тутар 6 күнүгэр Ытык-Күөлгэ “Миссис Таатта-2026” күрэххэ 9 нэһилиэк кэрэ аҥардара, далбар хотун-ыал ийэлэрэ сааскы бырааһынньыгынан үөрүүлээх дьоро киэһэни бэлэхтээтилэр. Баайаҕаттан Чэмэлиинэ Романова кыттан, “II вице-миссис Таатта-2026” титулу уонна “Көрөөччүлэр Биһирэбиллэрэ” анал ааты ылан ситиһиилээхтик кытынна. Көҕүлээн тэрийээччи — нэһилиэк дьахталларын түмсүүтэ (сал. С.Романова). Бу күн Таатта театрыгар “Кыталык Куо-2026”, “Уолан -2026” — оскуола оҕолорун ортотугар ыытыллыбыт күрэххэ Уруйдаана Андросова “Мисс Интеллект”, Дьулуур Хатылаев “Мистер Дружба” анал ааттарынан бэлиэтэннилэр.

-Аан дойду дьахталларын күнүгэр нэһилиэкпит 10 Герой Ийэлэриттэн биирдэстэрэ, күн бүгүн оҕо-сиэн тапталыгар, кыһамньытыгар олох дьолун үллэстэр үтүө-мааны киһибит, Герой Ийэ Александра Алексеевна Христофорова Наталья Михалева-Сайа “Саха суола” биэриитин дьоруойа буолла. “Паналар дуо?”- дэтэр халыҥ аймаҕы тэниппит ийэ, эбэ, хос эбэ 95 дьыл хаарын уулларбыт олоҕун суолун норуодунай суруйааччылыын атах тэпсэн олорон ирэ-хоро сэһэргэстэ. Биэриини биир дойдулаахпыт, “Саха” НКИК режиссера Матрена Попова уһулан, таҥан оҥордо.

— Кулун тутар 9 күнүгэр нэһилиэк кэрэ аҥардарыгар “Уолбан” вокальнай ансаамбыл айар киэһэтин тэрийдэ.*текст*