“Байаҕантай” информационнай киин Планерка сонуннара Кулун тутар 10 күнэ, 2026 с. Оптуорунньук

“Байаҕантай” информационнай киин

Планерка сонуннара

Кулун тутар 30 күнэ, 2026

Бэнидиэнньик

Куула түөлбэ олохтоохторугар тардыллыбыт ититии ситимигэр 10 ыал холбонно. Бу котельнайга маастарынан И.Р.Романов, оператордарынан Р.Р.Никитин, П.И.Потапов, Е.Г.Потапов, М.А.Тордуин, чох кутар тракторга Г.И.Потапов үлэлиэхтэрэ. “Туох-ханнык кыһалҕа тахсарын туоратарга мантан саас ититиигэ ыаллар сыыйа холбоноллоро ордук”, — диэн баһылык Александр Романович тоһоҕолоон эттэ.
Балыыһа тутуллуутугар сирин бэлэмнээһин үлэтэ саҕаланна. И.И.Бочонин сири тэҥнииргэ туттуллар 200 куб. кутуу матырыйаалы спонсордаата, Андрей Трофимович Дедюкин 2 массыынаны көмө быһыытынан аҕалан босхо кутта. Салҕыы үлэ нэһилиэнньэттэн киирбит харчыттан үбүлэниэҕэ.
Кулун тутар 25 күнүгэр “Чолбон” сурунаал төрүттэммитэ 100 сылын көрсө Покровскай куоракка ыытыллыбыт республика литературнай түмсүүлэрин форумугар Россия суруйааччыларын Сойууһун чилиэнэ, литературнай критик О.Н. Макарова кыттыыны ылла, эксперт быһыытынан үлэлээтэ, “Көмүлүөк күлүмэ” литературнай түмсүү үлэтин сырдатта. “Саха Сирин суруйааччылара” ассоциация директора Олег Сидоров салайааччылаах төгүрүк остуол быһаарыытынан, М.Н.Хатылаева аатынан Баайаҕа модельнай библиотекатын “Көмүлүөк күлүмэ” литературнай түмсүү үлэтин уопутун тарҕатыы форум резолюциятыгар киирдэ. Форум чэрчитинэн ыытыллыбыт литературнай кириитикэ күрэһэр Г.И.Неустроева Айаанньа Уус “Саҕахтан саҕыллар санаалар” кинигэтин ырытан, Биһирэбил бирииһинэн бэлиэтэннэ.
“Мандар Уус” этнологическай музей “Өбүгэ тыына”- улахан дефиле диэн Изабелла Элякова бырайыагынан Ытык-Күөлгэ ыытыллыбыт тэрээһиҥҥэ кыттыыны ылла. Манна норуот маастара Изабелла Элякова Моҕол Ураһаҕа анаан тикпит куобах, саһыл, бөрө суорҕаннара, кус төбөтө чыллырҕастаан сыттык дьон көрүүтүгэр таҕыста. Тэрээһин “Таатта саарыта” түмсүү 25 сыллаах үбүлүөйүгэр ананна.
“Мандар Уус” кииҥҥэ норуот уус-уран оҥоһуктарын маастара С.С.Неустроева туоһунан иискэ эдэр иистэнньэҥнэри уһуйууга маастар — кылаас ыытта. Бу күннэргэ суолу баттаһа кииҥҥэ, түмэлгэ күҥҥэ 5-6-лыы делегация кэлэр, Мандар Уустан сүбэ-саргы ыла үгүс киһи сылдьар.
Спортинструктор Е.П.Накатова анал байыаннай дьайыыга сырдык тыына быстыбыт хорсун буойун ыччаппыт, оскуола сылларыгар мас тардыһыытыгар республикаҕа ситиһиилээхтик кыттыбыт Аркадий Андросов кэриэһигэр мас тардыһыыга оскуола оҕолоругар республика аһаҕас турнира ыытылларын иһитиннэрдэ. Күрэхтэһии муус устар 10-11 кк. Р.Романов аатынан КСК ыытыллыаҕа.
Спорт сонуннара: Н.Тарскай аатынан республика көҥүл тустууга чемпионатыгар Таатта улууһун хамаандата 2-с миэстэни ылан историческай суолталаах кыайыыны ситистэ. “57 кг. хамаанда капитана Федор Постников үһүс төгүлүн бастаан, Илларион Федосеевы, Григорий Массаевы ситтэ!”,- диэн спорт бэтэрээнэ Анатолий Мурунов сырдатар. Бэлиэтээн эттэххэ, Федор Постников Баайаҕаттан хаан тамайар. Аҕата, биллиилээх суруналыыс, суруйааччы Александр Постников-Сындыыс Баайаҕа Луковцевтарыттан төрүттээх.