“Байаҕантай” информационнай киин Планерка сонуннара Кулун тутар 2 күнэ, 2026с. Бэнидиэнньик

— Олунньу 22 күнүгэр Дьокуускайга ыытыллыбыт “Дархан Уус” Саха сирин тимир уустарын XV сүрүн түһүлгэтигэр Баайаҕаттан 14 уус кыттыыны ылла. “Уус-уран оҥоһуулаах быһах”(12 кыттааччы) — Баайаҕаттан төрүттээх Айысхаан Данилов 3 миэстэ; “Бастыҥ ас быһаҕа” (54 кыттааччы) — Айысхаан Данилов — 1 миэстэ, Федор Неустроев 3 миэстэ; “Дэгиттэр быһах” (48 кыттааччы) — Гаврил Мохначевскай 1 миэстэни ылан үрдүк ситиһиилэннилэр.

—Олунньу 13, 22 кк. Саха АССР оскуолаларын үтүөлээх учуутала, олоҕун оҕону — ыччаты иитиигэ, үөрэтиигэ анаабыт Х.А.Слепцова төрөөбүтэ 95 сылыгар оскуолаҕа Туллук» Өй күрэһэ, нэһилиэккэ «Маннык сиргэ түстэммиппин дьоллооҕунан ааҕынабын» -Улахан Педсовет- ахтыы киэһэтэ ыыттылыннылар. Бу туһунан «Байаҕантай» ИК олунньу 24 күнүнээҕи таһаарыытыгар сиһилии суруллубута.

— Олунньу 23 күнүгэр, Аҕа дойдуну көмүскээччилэр күннэригэр, түөлбэнэн күрэхтэһии тэрилиннэ. Бу киэһэ балыыһа тутуллар сирин кутууга анаммыт дьаарбаҥкаҕа 100 тахса тыһыынча киирдэ, күрүө тутуутугар салҕыы харчы хомуллар.

— Олунньу 26 күнүгэр улуустааҕы комплекснай буулдьанан ытыы күрэһэр дойдуларын аатыттан Ытык – Күөл баайаҕалара кыттан уопсай зачекка 5-с, группаҕа 3 миэстэни ыллылар.

-Олунньу 26 күнүгэр “Ньургуһун” уһуйааныгар “Уунабын эһиэхэ сүрэҕим сылааһын!” диэн РСФСР үөрэҕириитин туйгуна, “Таатта улууһун сайдыытыгар киллэрбит кылаатын иһин” бэлиэ хаһаайына, новатор-методист, иитээччи Елизавета Васильевна Мандарова төрөөбүтэ 80 сылыгар истиҥ-иһирэх ахтыы киэһэтэ буолла. Уһуйааҥҥа Е.В.Мандароваҕа аналлаах стендэ оҥоһуллан ыйанна.

— Олунньу 27 күнүгэр түөлбэнэн волейбол күрэһэр эр дьоҥҥо: “Сайдыы”- 1 миэстэ, “Томтор-Куула” – 2 миэстэ, “Илин” – 3миэстэ; дьахталларга: “Сайдыы”- 1 миэстэ, “Томтор-Куула” – 2 миэстэ, “Арҕаа” – 3 миэстэ.

Бу күн улуус киинигэр Олоҥхо уонна Саха сирин норуот маастарын күннэрин чэрчитинэн “Таатта-олоҥхо биһигэ” тэрээһиҥҥэ “Дархан Уус” кыайыылаахтарын чиэстээһин ыытылынна, норуот маастара, биир дойдулаахпыт Федор Чээрин чороон оҥорууга маастар-кылаас ыытта, Баайаҕа уустара, иистэнньэҥнэрэ быыстапкаҕа кыттыыны ыллылар, О.Н.Макарова “Олоҥхоҕо итэҕэл көстүүтэ” лекция аахта.

-Олунньу 28 күнүгэр Мэҥэ-Алдан оҕо искусствотын оскуолата, нэһилиэк уус-уран самодеятельноһын кыттыылаахтара “Сааскы тэтим” кэнсиэринэн ыалдьыттаатылар, талба талааннарынан көрөөччүлэри дьиҥ-чахчы сөхтөрдүлэр. Гастролу тэрийбит биир дойдулаахтарбыт Е.П. Аммосова, А.П.Захарова кэнсиэри үөрэммит оскуолалара 155 сылыгар анаабыттара кэрэхсэбиллээх үтүө холобур буолар. СР култууратын туйгуна, СР култууратын үтүөлээх үлэһитэ, «Томпо улууһун култууратын уонна искусствотын сайдыытыгар кылаатын иһин», “Мэҥэ — Алдан нэһилиэгин сойиальнай-экономическай сайдыытыгар кылаатын иһин”, «За вклад в развитие народного художественного творчества РС(Я) бэлиэлэр туһааннааҕа хореограф Елена Пантелеймоновна туруорбут үҥкүүлэрэ дириҥ ис хоһооннорунан көрөөччүлэри долгуттулар, үөртүлэр. Киэн туттар биир дойдулаахтарбытыгар нэһилиэк баһылыгын Махтал Суруктара туттарылынна.

-Куулаҕа киирэр хочуолунай ис өттө оҥоһуллан бүтэн эрэр, кулун тутар ыйга уу ыытан аһыллыы былааннанар. Куула олохтоохторо ТОС тэринэн ууну ыраастыыр тутууга (водоочистительное сооружение) грант суруйарга Харбалаахха баран көрөн-истэн кэллилэр.

—Кулун тутар 5 күнүгэр Олоҥхо балаҕаныгар биллиилээх худуоһунньук Николай Рязанскай «Мин олоҕум олоҥхото» диэн биир күннээх персональнай быыстапкатын Баайаҕаҕа тэрийэр. Сэргээҥҥит кэлиҥ, кэрэни кэрэхсээҥ, худуоһунньуктуун илэ алтыһыы сэдэх түгэнин мүччү тутумаҥ!