“Байаҕантай” информационнай киин Планерка сонуннара Олунньу 16 күнэ, 2026 с.

Олунньу 10 күнүгэр И.А.Сивцева салайааччылаах улуустааҕы норуот айымньытын дьиэтин специалистара “Мандар Уус” Айылгы, Айымньы киинигэр Борис Федоровичтыын көрсөн сүбэ-соргу ыллылар, оскуолаҕа нэһилиэнньэни кытта көрсүһүү тэрийдилэр. Култуура үлэтигэр уларытыылары, “Мандар Уус” — креативнай, научнай киин тэриллибитин кэпсээтилэр. Таатта улууһун, Мандар Уус култуурунай кодугар тирэҕирэн Манчаары оонньуулара ситиһиилээхтик, үрдүк таһымнаахтык ааспытын бэлиэтээтилэр, Мандар Ууска махталларын тиэртилэр. Баайаҕа Моҕол Ураһата Россияҕа ыал буолууну сокуонунан бигэргэтэр статустаах республикаҕа үс сир иһигэр киирбитин үөрэн-көтөн иһитиннэрдилэр. (Өлүөнэ очуостара, Баайаҕа Моҕол Ураһата, Дьокуускай культура -сынньалаҥ паарката. )

Олунньу 12 күнүгэр Саха республикатын Правительствотын отчуота буолла. Правительство председателин солбуйааччы, бөлөх салайааччыта Георгий Степанов Мандар Ууска кини аата иҥэриллибит алмаас куопуйатын үөрүүлээх быһыыга-майгыга туттарда. Санатар буоллахха, ааспыт сылга ытык киһибит аатын 80 үбүлүөйдээх сааһынан, АЛРОСА хампаанньа 51, 39 караттаах ювелирнай алмааска иҥэрбитэ.

Туруорсуулар, этиилэр: Моҕол Ураһа өрөмүөнэ, “Мандар Уус” кииҥҥэ штатнай единицэ, Анал байыаннай дьайыы кыттыылаахтарыгар госпиталь, тыа сиригэр элбэх оҕолоох ыалга өйөбүл, 100 төбөҕө саҥа хотон тутуута, оскуола капитальнай ремона уо.д.а.

Бу күн улуус быраастара кэлэн нэһилэнньэҕэ диспансеризация ыыттылар.

Олунньу 13 күнүттэн нэһилиэккэ Төрөөбүт тыл, сурук-бичик нэдиэлэтэ тэрээһиннээхтик саҕаланна. Туһааннаах тэрилтэлэр социальнай ситимнэргэ үлэлэрин сырдаталлар.

Республикаҕа мас тардыһыытын күрэһэр Баайаҕаттан 6 мадьыны кытынна. Константин Жирков – 2-с, Петр Винокуров, Михаил Попов 3-с бочуоттаах миэстэлэри ыллылар. Таатта улууһа 27 хамаандаттан 3 –с бириистээх миэстэни ситистэ.

Улууска мини- футбол күрэһэр баайаҕалар 4-с миэстэҕэ тигистилэр .

Улууска оскуола оҕолоро спортка ситиһиилэннилэр: теннискэ Сергей Сметанин, Вася Хатылаев – 2 миэстэ ( сал. Н. Н.Кустуров), шахмакка Баайаҕа оскуолата 2 миэстэ, Вася Хатылаев -1 миэстэ, Аман Афанасьев-3 миэстэ, Айна Чахова -4 миэстэ (сал. П.И.Афанасьева).

Куулаҕа “Альтернатива” тэрилтэ ититиигэ холбонуу үлэтин олунньу ый бүтүүтэ түмүктүөҕэ. Билигин 15 ыал холбонорго бэлэмнэрин эттилэр.
ППМИ харчыта кулун тутар маҥнайгы күнүгэр дылы хомуллан бүтэрэ ирдэнэр.