Туймаада Баайаҕаларын мунньаҕа

Соторутааҕыта Дьокуускай куорат дьаһалтатын дьиэтигэр Таатта Баайаҕатын эдэр баһылыга Романов Александр Романович биир дойдулаахтарын Туймаада Баайаҕаларын мунньан , атах тэпсэн олорон , ааспыт 2025 сыллаах үлэтин оччуоттаата, итиэннэ 2026 сыллаах үлэтин былаанын билиһиннэрдэ.. Бу көрсүһүүгэ үс көлүөнэ Баайаҕалар мустаннар дойдуларын солунун истэн , нэһилиэктэрин баһылыгын үлэтин хамнаһын сэҥээрэн элбэх тыын суолталаах боппуруостары көтөҕөн , өрө көтөҕүллүүлээхтик кэпсэттилэр. Манна студеннар, эдэр ыччат , уустар, предпринимателлэр , республика араас тэрилтэлэрин , культура ,бэчээт эйгэтин биллэр көстөр үлэһиттэрэ , аҕа саастаах көлүөнэ бары бааллар. Төһө даҕаны киин сиргэ олордоллор Туймаада Баайаҕалара , дойдуларыгар буола турар быһыыны майгыны ,үлэни хамнаһы истэ билэ олорор буоланнар эдэр баһылык отчуотун болҕойон иһиттилэр , элбэх боппуруостары биэрдилэр , баҕа санааларын эттилэр итиэннэ баһылык ыытар үлэтин сөптөөҕүнэн сыаналаатылар.

Чуолкайдаан эттэххэ Туймаада хочотугар 300 чэкэ Баайаҕаттан төрүттээхтэр түмсэн олороллор. Баайаҕаҕа бэйэтигэр 700 кэ олохтоох баар буоллаҕына бу орто нэһилиэккэ тэҥнэһиэн сөптөөх ахсааннаах түмсүү буолар.

Эдэр баһылык , Александр Романович ,Баайаҕаҕа нэһилиэгэр үлэ хамнас 4 түөлбэнэн ыытыллар буоллаҕына эһиги бэһис түөлбэ буолаҕыт диэн общественнай үлэҕэ хамнаска туора турбакка көмөлөһөн,кыттыһан иһин, дойдугут чиэһин оройуоннай спортивнай күрэхтэһиилэргэ ,культурнай тэрээһиннэргэ да көмүскэһиҥ диэн ыҥырда. Маны таһынан Александр Романович, Дьокуускай Баайаҕалара дойдугутугар чугаһааҥ, дойдугутугар олорбут дьиэлэргитин , быраҕыллыбыт уһаайбаларгытын сөргөхсүтүн, дойдугутугар көһөн тахсан эбэтэр аймахтаргытыгар тахсан сүөһүтэ ,сылгыта ииттиҥ, оттуур сири, сайылык сирдэрин сыһыарыыны сокуон төһө көҥүллүүрүнэн көмөлөһүөхпүт , эдэр дьоннор “Баат” кооперативка сыстан тахсаҥҥыт бултаан алтааҥ диэн ыҥырыытын мустубут дьон ытыс тыаһынан көрүстүлэр. Нэһилиэнньэ ахсаана аччыы турар көстүүтэ бүгүн үгүс улууска баар суол. Онон Баайаҕа эдэр салайааччыта Александр Романов дойдутун дьонун мунньан нэһилиэк кыһалҕаларын быһаарсарга бииргэ ситимнээхтик үлэлииргэ, көһөн тахсан дойдугутугар олохсуйуҥ диэн ыҥырыыта бу Республика үрдүнэн бүрүүкээбит сүрүн кыһалҕаны быһаара сатааһыҥҥа хорсун хардыы курдук сыаналаныан , атын нэһилиэктэр баһылыктарыг

ар холобур буолуон сөптөөх , диэн Дьоккуускай куорат мэрин социальнай боппуруостарга солбуйааччыта В.В. Аржаков тыл этэригэр бэлиэтээтэ. Александр Романович отчуотун сэргээн иһиттибит уонна үлэ-хамнас хаамыытын сөбүлүүрбүтүн биллэрдибит. Ытыктыыр уһуйааччыбыт Татьяна Игнатьевна Андросова, Иннокентий уонна Иван Михайлович Андросовтар , Иван Гаврильевич Неустроев , Баайаҕабыт чулуу ыччаттара Антонина Седалищева, Анатолий Потапов, Сергей Мандаров, Кирилл Тимофеев уо.д.а. сайдам санааларын үллэһиннилэр.

Тыл этиитигэр үгүс дьон аны сайын биир дойдулаахпыт биллэр уус, бөлүһүөк Саха омук оһуорун мандарын, чөмөхтөөбүт Республика бочуоттаах олохтооҕо , саха омук дьиҥ чахчы духовнай лидера - Борис Федорович Неустроев 80 сыллаах үбүлүөйүн түмүктүүр тэрээһинэ - Уустар ыһыахтарын тэрээһинигэр көмөлөһөргө бэлэмнэрин биллэрдилэр.

Маны таһынан Туймаада Баайаҕалара 15 сыл устата тас Баайаҕалар итиэннэ Баайаҕа олохтоохторун икки ардыларыгар ыытыллыахтаах спорт 8 көрүҥэр ыытыллар үгэскэ кубулуйбут күрэхтэһии быраабылаларыгар этиилэри киллэрдилэр, бу киэһээ үгэскэ кубулуйбут оонньуулары көҕүлээн, бириискэ убаһа туруоруон баҕалаахтар көһүннүлэр. Манна даҕатан эттэххэ ,дойдуларыгар сылгы , сүөһү тутан биир дойдулаахтарын үлэлээх ,дьарыктаах оҥорор баҕалаах элбэх киһи баара чуолкайданна. Түмүкпэр, хас биирдии Баайаҕа ыччата дойдутун кытары ситимин быспатын туһугар , 20 тэн тахса сыл нэһилиэкпит баһылыгынан “Барыбыт туһугар Баайаҕабыт туһугар» диэн кэскиллээх тылларынан салайтаран тэтимнээхтик үлэлээбит олохтон хомолтолоохтук туораабыт Роман Романович Романов ыыппыт үлэтин бэйэтин төрөппүт уола Александр Романович утумнаахтык салгыы сылдьара киһини долгутар, итиэннэ үтүө түмүктэрдээх буолуоҕар биир да киһи саарбахтаабакка санаата көтөҕүллэн хайыы уйэ чуумпурбут Дьоккуускай уулуссаларынан сарсыҥҥыга бигэ эрэллээх тарҕастыбыт.